निर्वाणानंतरच्या कविता

 कोवळ्या वयात शक्तिपात 

आणि मध्ये काहीच नाही 

तगमग तगमग 

मगमग मगमग 

मला वाटले तू मला सोडून दिलेस 

बायकांच्यात डचमळलो 

फिलोसॉफीत घुटमळलो 

सोशॉलॉजीत ताटकळलो 

इतिहासात भटकळलो 

फ्यूचरोलॉजीत कुंडली मांडली 

कवितेमध्ये कुंडलिनी सांडली 

सर्व पसारा तुझ्यासाठी मांडला 

सर्वकाही तुझ्यात कांडला 

ताडत राहिलो स्वतःला ताडोबा अरण्यात 

ऐकत राहिलो एकट्याने एकट्याचे अरण्यरुद्रन 

आता कळतंय 

तुला फक्त माझ्याकडून ११४ तंत्रे मांडून घ्यायची होती 

शारीरिक साधनेत सांडून घ्यायची होती 

थोडीशी शब्दांमध्ये लवंडून घ्यायची होती

आणि आता हा तू दिलेला शेवटचा अंतिम पात 

सारे पॉज संपवणारा 

मी मूर्ख होतो 

तू शहाणा केलेस 

आता दे आज्ञा 

संसारात थांबू की शून्यात येऊ ?

श्रीधर तिळवे नाईक 

(निर्वाण सिरीज मधील निर्वाणानंतरच्या कविता या काव्यफायलीतून)